Serikali ya Mapinduzi Zanzibar

KAMPENI YA “IMARISHA MABARAZA YA VIJANA ZANZIBAR”

Utangulizi

Kampeni ya Imarisha Mabaraza ya Vijana Zanzibar ni kampeni ya kuyasimamisha na kuyaimarisha Mabaraza ya Vijana Zanzibar kiutendaji. Kampeni hii imekuja baada ya Baraza la Vijana Zanzibar kupitia shughuli zake za kila siku kufanya ziara kwa Mabaraza ya Vijana Wilaya zote za Unguja na Pemba kuanzia 15 Oktoba 2024 hadi 06 Novemba 2024. Lengo lilikuwa kuangalia changamoto wanazokabiliana nazo pamoja na hadhi ya Mabaraza ya Vijana kwa ngazi zote za Wilaya na Shehia, sambamba na utambulisho wa Katibu Mtendaji mpya wa Baraza alieteuliwa na Mheshimiwa Rais wa Zanzibar tarehe 25 Septemba 2024.

Baadhi ya changamoto zilizobainika ni:

• Mabaraza ya Vijana kutofanya kazi vizuri.
• Kutokuwepo kwa uongozi kamili katika baadhi ya Mabaraza ya Vijana ngazi zote.

Hivyo, kuleta uhai kwa Mabaraza ya Vijana ni hatua muhimu ya kuhakikisha kuwa sauti za Vijana zinawasilishwa, changamoto zao zinapewa kipaumbele, na mchango wao katika maendeleo unatambuliwa.

Kampeni hii ilizinduliwa rasmi na Katibu Mkuu Wizara ya Habari, Vijana, Utamaduni na Michezo, ndugu Fatma Hamad Rajab tarehe 30 Novemba 2024 katika ukumbi wa Skuli ya Sekondari Tumekuja.

Lengo Kuu

• Kuleta uhai wa Mabaraza ya Vijana Zanzibar.

Muda wa Kampeni

Kampeni hii ni ya miaka mitatu (3), kuanzia 1 Januari 2025 hadi 31 Disemba 2027.

Malengo Mahsusi

• Kuyapa hadhi Mabaraza ya Vijana: Kuwawezesha kutambulika na kueleweka katika jamii na taasisi nyengine.
• Kutatua changamoto za Mabaraza: Kuimarisha maelewano kati ya viongozi na kuhakikisha kila mwanachama anapata fursa kwa mujibu wa utaratibu.
• Kukuza ushiriki wa vijana: Kuhamasisha vijana kujiunga na kushiriki katika maamuzi ya kijamii, kisiasa na kiuchumi.
• Kuwaelimisha vijana: Kuhusu haki na wajibu wao ndani ya Mabaraza ya Vijana.
• Kujenga uwezo na uongozi: Kuwapatia vijana mafunzo ya uongozi na ushiriki wa kijamii.

Mikakati ya Kampeni

• Kutoa elimu kupitia falsafa ya K5 kuhusu malengo ya Baraza.
• Kuongeza idadi ya wanachama wapya angalau 4,656 kwa mwaka.
• Kutoa zawadi kwa Mabaraza yatakayofanya vizuri.
• Kufanya vikao ngazi ya Wilaya na Shehia kila mwezi.
• Kushirikiana na wadau wa serikali, kiraia na sekta binafsi.
• Kuweka mfumo wa ufuatiliaji na tathmini ya mara kwa mara.
• Kuandaa mfumo wa kidijitali wa usajili wa wanachama.
• Kutumia vyombo vya habari na mitandao ya kijamii ipasavyo.
• Kutoa Tuzo za Mwaka kwa Mabaraza yanayofanya vizuri.
• Kuyasaidia Mabaraza kwa utaalamu na rasilimali fedha.

Matokeo Yanayotarajiwa

• Mabaraza ya Vijana kutambulika na kupata heshima katika jamii.
• Kufanya kazi kwa ufanisi na kutoa tija kwa Vijana wa Zanzibar.
• Kuvutia misaada ya kifedha na rasilimali kutoka kwa wadau.
• Kutoa viongozi vijana wenye ujuzi na maarifa ya uongozi.
• Kuwepo mashirikiano mazuri ya kiutendaji ngazi zote.
• Kuzalisha miradi yenye tija na fursa za ajira kwa vijana.
• Kuwajengea Vijana ubunifu na ari mpya.

Hitimisho

Ni wakati sahihi sasa kuleta uhai wa Mabaraza ya Vijana Zanzibar ili kutimiza adhma ya Serikali ya Mapinduzi ya Zanzibar kwamba Baraza la Vijana ni jukwaa na kiungo wakilishi cha maslahi ya Vijana. Hivyo, Baraza litafanya mashirikiano na wadau mbali mbali ili kufanikisha malengo hayo. Kampeni hii itakuwa kiungo muhimu cha Mabaraza ya Vijana kwa ngazi ya Shehia, Wilaya na Taifa.